الرئيسية » كل الأخبار » مقالات » محمود حجازي يكتب: ايوا يا مجدي إنت صرصار
أم الدنيا

محمود حجازي يكتب: ايوا يا مجدي إنت صرصار

إقالة مجدي الجلاد ” الصرصار ” من رئاسة تحرير جريدة الوطن .. بعد سنتين من الإستربتيز الصحفي في جريدته وممارسة كل أنواع الرخص والكذب والتلفيق في حق أي حد ضد نظام الديكتاتور القزعة .. درس جديد لأي حد طمعان في بيزنس او ” مصلحة ” مع نظام قمعي فاشي ورئيس فاقد الثقة في نفسه وفي كل إللي حواليه.

درس لكل ” عبدو مشتاق ” بيعتقد إنه هيقدر يلاقي مكان في دولة العسكر؛ إنك مهما شلحت وإتعريت ورقصتلهم إستربتيز .. ستبقى محل شك وغير موثوق فيك وهيعوروك في أقرب فرصة .. طالما إنت خارج دائرة مجموعة مصالحهم الضيقة جدا .

مررت للمجلس العسكري التعديلات الدستورية في مارس 2011 وعملت مش واخد بالك والمجلس العسكري بيقتل الثوار وقولت مخربيين وأمنت بيزنس العسكر في دستور 2012 ؟؟

مش مشكلة … بردوا هتتقتل وتتسجن وتمنك هيبقى أرخص من تمن الرصاصة إللي بتموت بيها

طب شرعنت العودة المظفرة لدولة العسكر في كابوس 3 يوليو المنبثق عن نمرة 30 يونيو .. وقولت أنا سابقكم ب 100 سنة ضوئية .. وزي العبيط لفيت العالم تسوق لإنقلاب صريح على الثورة ؟؟

ولا هيفرق مع العسكر في حاجة .. بردوا هتفضل رخيص في نظرهم ومرفوع عليك قواضي توصل للإعدام .. وسايب العيال هنا تموت لوحدها من القهر والتعذيب في سجون الجنرال إللي فضلت تحلف 100 يمين إنه ” غير طامح في الحكم “

عزيزي المشتاق إلى رضا العسكر .. إطمن ؛ عمرهم ما هيرضوا عنك .. ويا تعيش ” ملو هدومك ” وبتقول لأ لكل الظلم “مش شوية منه” .. وبتطالب بالعدل لكل الناس ” مش للناس إللي شبهك بس ” .. أو تعيش “حمدين ” بتتسول الرضا من أي حد على كتفه دبابير .. وتشتكي في القنوات والصحف إنهم مبعتوش دعوه لحضور حفلة إفتتاح التفريعة الجديدة.