الرئيسية » كل الأخبار » محمود حجازي عن اعتصام أفراد الشرطة: نجهز الفيشار بقى
أم الدنيا

محمود حجازي عن اعتصام أفراد الشرطة: نجهز الفيشار بقى

اعتصام أفراد الشرطة والإشتباكات وتبادل إطلاق النار مع الأمن المركزي .. غير إنه مبهج ومريح وخلقلي حالة من السلام الداخلي والسكينة كراهب بوذي يعيش وحيدا أعلى جبال التبت الجليدية متعبدا في صومعته أمام تمثال نحاسي للكابتن شادي محمد .

الإعتصام كمان رسالة لتحالف ” ولاد المرة ” بزعامة الجنرال الخرونج .. إن ما يجمعهم هو المصالح وفقط ويانعيش عيشة فل يا نموت إحنا الكل .. وأن أي محاولة للعبث بالسبوبة فهو لعب بالنار يا معلم منك ليه .. والحديث عن ” ولاءات ” أيديولوجية أو فكرية تجمع هذا التحالف .. هو محض ” هرتلة ” .. وإن مبدأ ” توتو على كبوتو و أبجني تجدني ” هو اللغة الوحيدة المعتمدة داخل تحالف المصالح الحاكم بثلاثيته ( جيش – شرطة – قضاء ) …

نقدر كمان نسحب التعريف دة على مظاهرات ” موظفي مصلحة الضرائب ” المناوئة لقانون الخدمة المدنية الإنتقائي .. عين أعيان الجهاز البيروقراطي للدولة .. وأكثر الكائنات الحية على ظهر الكوكب ولاء للدولة والنظام ونشرة الساعة 9 .. خرجوا وتظاهروا – وجثوا نبض – الحكومة وعملوا بنرات وبيجهزوا لإضرابات وتصعيد في المرحلة الجاية .

مشكلة السيسي إنه مُصر يكلم دراويشه على إنهم ” شوية بهايم ” .. حرفيا هوا بيكلمهم على إنهم شوية بهايم في زريبة .. ومؤخرا مبقاش يهتم بجودة الكدب أو الهرتلة إللي بيقولها .. في إستخفاف واضح بميلفاته وعبيده وإئتلاف ” يا كايدهم يا سيسي ” ..

طنشوله وهوا بيقولهم إن أرباح تفريعة قناة السويس غطت تكلفتها في اسبوعين عمل .. ومش هيقفوا كتير عند الدين الداخلي إللي وصل لأرقام ” لوز اللوز ” .. وهيعملوا من بنها وهوا بيقلل ميزانية الصحة ب 4 مليار جنية .. وهيهيصوله وهوا بيعمل كام طريق من ” ابو كارته ” … رغم إنهم عارفين إنه كله رايح للجيش .. بس قشطة

بس إللي مش هيعدوه .. إنك يا معلم أول إمبارح تقولهم إشتغلوا على عربيات خضار أو توكتوك وإن مفيش ومعنديش .. وتاني يوم تصدر قرار جمهوري بزيادة بدل طبيعة العمل لظباط الجيش 250% … لا بجد 250% يا مفتري ..

وفي الوقت إللي زودت رواتب الجيش والشرطة 3 مرات .. وإديت للقاضي 3000 جنية بدل علاج .. رايح تعمل قانون الخدمة المدنية على موظفين ” مش لاقيين ” ياكلوا أساسا وإستثنيت وزارات ” معينة ” لإعتبارات الولاء والمصالح … لأ إنت بتهرج بقى !!

عموما .. فاتورة إرضاء تحالف المصالح مكلفة جدا .. ومفيش قدام الجنرال الخرونج غير إنه يكمل فشخ في الطبقات الإجتماعية إللي خارج التحالف بتاعه .. وزي ما بند الرواتب في ميزانية 2015 إرتفع .. وعوضه من بند الصحة والتعليم بتاع الغلابة وخفضه بـ 4 مليار دولار .

انا مبسوط إنه بدأ ” يعور ” الطبقات دي في الحاجة الوحيدة إللي ” بتلسوعها ” … وهي الفلوس

في ظل إقتصاد رايح في داهية وبورصة خسرت 16 مليار جنية في إسبوع .. في موجة هروب جماعي للمستثمرين الأجانب والمصريين .. اه والله المصريين كمان .. وإمبارح شركة “china glass ” إللي هيا كانت أخر مشروع الحكومة كانت بتتغنى بيه من أطلال المؤتمر الإقتصادي أبو موكيت وسجاد شيك .. فركشت إمبارح وقالت مش لاعبه لأن المناخ ” غير ملائم “

نجهز الفيشار بقى .. ونستمتع بخناقة السيسي مع الدولجية إللي هتتصعد يوم بعد يوم ..