الرئيسية » كل الأخبار » محمود حجازي يكتب: محاولات تزوير التاريخ
أم الدنيا

محمود حجازي يكتب: محاولات تزوير التاريخ

أهم فعل مقاوم بيقوم بيه جيلنا حاليا هو إنه رافض ياكل الأونطة وبيقاوم محاولات تزوير التاريخ .. جيلنا بكل وضوح شايف إن 23 يوليو إنقلاب على ملكية دستورية لم تكن جنة الله في أرضة .. ولكنها حتما تحولت إلى جحيم الاستبداد والقمع والدولة البوليسية على إيد عسكر يوليو إللي بيحكموا مصر حتى الأن.

إحنا بنقاوم محاولات التزوير مش علشان ننتصر للحقيقة وبس .. إحنا كمان بنقاوم محاولات تزوير التاريخ إللي بنعيشها حاليا … على إيد الجنرال المايص وإعلامه .. إللي وصل بيهم البجاحة إنهم بيزوروا أحداث شوفناها بعنينا .. وبيحاولوا بكل عبط يقنعونا إن الثورة إللي قمنا بيها كانت مؤامرة ..

بنقاوم محاولات توريثنا ادبيات اجيال نزلت تهيص في الشوارع لعبد الناصر و حافظ اﻻسد وصدام وهما بيسرقوا مستقبلهم .. جيل مهزوم لدرجة انه ممتن لعبد الناصر علشان دخله المدرسة بالمجان .. ومش فارق معاه إنه انتج دولة قمعية بوليسية ودولة خوف تحولت من دولة واعدة صاعدة إلى دولة الخوف الفقيرة إللي بتتسول الأكل والشرب والفلوس من دول لا تمتلك ربع إمكانياتها.

بنقولهم إننا عارفين إن كل العسكر كدابين .. من أول ما كانوا بيقولوا ” مصر تحارب الإستعمار ” .. لغايت ما تحول الشعار إلى ” مصر تحارب الإرهاب “

وشايفين مفيش فرق بين جنرال أخرق كان بيقولهم ” ارفع راسك يا اخي ولى عهد الإستعمار ” .. وجنرال أهبل تاني بيقولهم ” مصر ام الدنيا وهتبقى قد الدنيا “

بنقاوم دولة الدجل والكدب .. دولة أرخص ما فيها الإنسان .. وسعر الرصاصة إللي بنتقتل بيها بقت أغلى من سعر البني ادم في بلد ديونها وصلت 2.4 تريليون جنية بعد ما كانت ديونا صفر سنة 1951

يمكن مكوناش موجودين لما اليابان بعتت بعثة في 1943 علشان تدرس تجربة الترام المصرية وتنقل التكنولوجيا دي ليها … بس كنا موجودين سنة 1990 لما اليابان إدتنا المترو منحة لا ترد .

قولوهم إننا شايفين الحقيقة كاملة ومبناكلش من الأونطة .. ممكن نختلف على تجربة الملكية في مصر لاننا مشوفنهاش … بس نقدر نقيم بكل وضوح مخرجات دولة العسكر اللي شايفها قدامي ..

وبعد 63 سنة حكم عسكر ومهما إختلف مندوب العسكر في قصر الرئاسة .. فالحصاد هوا دولة فاشلة قمعية تتسول وتعيش على القروض .. 40% من شعبها تحت خط الفقر .. رقم واحد عالميا في امراض الكبد والتحرش والموت بحوادث السير .. من أسوأ 10 دول في التعليم والصحة والفساد .. بنتسول الأكل والفلوس .. ووصل بيها الإهانة والذل إننا بنتسول بططاين وملابس داخلية مستعملة من الخليج.

تحية للي بيقولوا لأ دلوقت وقبل كدة .. وشايفين الحقيقة كاملة من البداية ..